Шығыс Қазақстан облыстық ЖИТС-тің алдын алу және оған қарсы күрес орталығында трансгендер адамдарға (ТГА) медициналық қызмет көрсету мәселелеріне арналған оқыту семинары өтті. Іс-шараның мақсаты – дәрігерлердің ТГА өкілдерінің қажеттіліктері туралы хабардарлығын арттыру және АИТВ-ның алдын алу мен емделуге қолжетімділікті жақсарту.
Семинар барысында трансгендер адамдар арасында АИТВ жұқтыру қаупін арттыратын негізгі себептер қаралды. Қатысушылар бұл мәселені әлеуметтік және медициналық тұрғыда жан-жақты талқылады.
Әлеуметтік және құрылымдық факторлар арасында стигма мен кемсітушілік ТГА өкілдерін қоғамнан оқшаулануға, жұмыссыздыққа, тұрақты баспананың болмауына және медициналық көмекке шектеулі қолжетімділікке алып келетіні айтылды. Сонымен қатар, көптеген трансгендер адамдар медицина қызметкерлерінің трансфобиялық көзқарастарынан қорқып, денсаулық сақтау жүйесіне сенімсіздікпен қарайды. Жиі жағдайда олар жыныстық қызмет көрсетуге мәжбүр болады немесе сексуалдық зорлық-зомбылыққа ұшырайды, бұл да АИТВ жұқтыру қаупін арттырады.
Семинар аясында медицина қызметкерлері үшін трансгендер адамдармен қауіпсіз әрі құрметке негізделген жұмыс жүргізуге бағытталған нақты әрекет ету алгоритмдері әзірленіп, жан-жақты қарастырылды. Бұл схемалар дәрігерлерге ТГА өкілдеріне сапалы көмек көрсетуге, олардың ерекшеліктерін ескеруге және ПиЕМ сияқты заманауи алдын алу әдістеріне қолжетімділікті қамтамасыз етуге мүмкіндік береді.
Ұйымдастырушылардың айтуынша, мұндай семинарлар Қазақстанда АИТВ-мен күресте және инклюзивті медициналық қызметті дамытуда маңызды рөл атқарады.
