ЖИТС-пен күрес күніне орай Шығыс Қазақстан облыстық ЖИТС орталығында Ашық есік күні өтті. Іс-шара өңір тұрғындарын ЖИТС-тың алдын алу, тестілеуден өту және мамандардан кеңес алу сияқты маңызды тақырыптарға назар аударуға шақырды.
Қонақтарға жедел АИТВ тестілеу қызметі ұсынылды, нәтижелер небәрі 20 минут ішінде дайын болды. Сондай-ақ, тілек білдірушілер қан тапсырып, толыққанды зертханалық талдау жасата алды. Әрбір қатысушыға АИТВ инфекциясының жұғу жолдары, алдын алу және заманауи емдеу әдістері туралы ақпараттық материалдар таратылды.
Көпшіліктің қызығушылығын тудырған тағы бір бөлім – дәрігерлердің кеңестері болды. Олар келушілердің сұрақтарына нақты әрі толық жауап берді.
Іс-шара қонақтарының бірі – Анна есімді жас әйел өз әсерімен бөлісті:
“Мен ұзақ уақыттан бері АИТВ-ға тест тапсыруды жоспарлап жүрдім, бірақ әрдайым уақыт таппай немесе батылым жетпей жүретін. Бүгінгі шара мен үшін тамаша мүмкіндік болды. Бәрі тез әрі ыңғайлы өтті, ең бастысы – тегін. Енді денсаулығым үшін алаңдамаймын.”
Тағы бір қатысушы Дмитрий мұндай іс-шаралардың қоғам үшін маңыздылығын атап өтті:
“Мен негізі жай қызығушылықпен келдім, бірақ осындай жоғары деңгейдегі шараны көріп таңғалдым. Көп пайдалы ақпарат алуға болады, мамандар бәрін ашық әрі түсінікті түсіндіреді. Тестілеу еш қорқынышты емес. Осындай шаралар адамдардың алдын алу мәселелеріне назар аударып, көмекке жүгінуден қорықпауына ықпал етеді деп ойлаймын.”
Бұл іс-шара тек денсаулықты тексеру мүмкіндігі ғана емес, сонымен бірге АИТВ туралы мифтер мен стигманы жоюға қадам болды. Ұйымдастырушылар мұндай бастамалардың эпидемиямен күрестегі рөлін атап өтіп, қоғамды ақпараттандыру мен жауапкершілікті арттырудың маңыздылығын еске салды.
