«Өскемен көпсалалы колледжінде» Дүниежүзілік ЖИТС-пен күрес күніне арналған арнайы дәріс өтті. Іс-шараны Шығыс Қазақстан облыстық ЖИТС-тің алдын алу және оған қарсы күрес орталығының мамандары ұйымдастырды.
«Адам құқықтары жолында - дұрыс жолды таңдаңыз!» тақырыбы аясында студенттерге АИТВ-ның алдын алу шаралары туралы кеңінен ақпарат берілді. Мамандар жастарға өз денсаулығына жауапкершілікпен қараудың, сондай-ақ адам құқықтарын құрметтеудің маңыздылығын ерекше атап өтті.
Дәрісте АИТВ-мен өмір сүретін адамдарды стигматизациялауға қарсы тұру және олардың құқықтарын қорғау мәселелеріне де ерекше назар аударылды. Ұйымдастырушылардың айтуынша, әрбір азаматтың құқықтарын құрметтеу – қазіргі қоғамның басты құндылығы және ЖИТС эпидемиясымен күрестегі маңызды қадам.
«Біздің мақсатымыз – жастарға АИТВ/ЖИТС қаупі мен алдын алу жолдары туралы ақпарат беру ғана емес, сонымен қатар бұл ауруға тап болған адамдарға деген құрмет пен түсіністік қалыптастыру», – деді мамандар.
Дәріс соңында студенттер мамандарға сұрақ қойып, жан-жақты жауап алды. Мұндай іс-шаралар жастардың білім деңгейін арттырып қана қоймай, толерантты қоғам құруға ықпал етеді.
