2025 жылғы 12–16 мамыр аралығында Қазақстан Республикасында Репродуктивті денсаулық апталығы өтуде. Бұл апталықтың мақсаты — халықтың, әсіресе жастардың репродуктивті денсаулығын сақтау, отбасын жоспарлау және жыныстық жолмен берілетін инфекциялардың (ЖЖБИ), соның ішінде АИТВ-ның алдын алу бойынша ақпараттық-ағартушылық жұмыстарды күшейту.
Шығыс Қазақстан облыстық ЖИТС-тің алдын алу және оған қарсы күрес орталығы репродуктивті денсаулыққа қамқорлық — өз денеңе жауапкершілікпен қараудан, ЖЖБИ жұғу жолдарын білуден және тұрақты түрде медициналық тексерістен өтуден басталатынын еске салады.
Неліктен ЖЖБИ туралы білу маңызды?
Жыныстық жолмен берілетін инфекциялар көп жағдайда белгілерсіз өтеді, бірақ сонымен қатар ауыр асқынуларға әкелуі мүмкін: бедеулік, созылмалы қабыну процестері және қатерлі ісіктер. Олардың кейбірі, мысалы АИТВ, уақытында анықталмаса, өмірге қауіп төндіруі мүмкін.
ЖЖБИ-ге жататындар:
• хламидиоз;
• гонорея;
• мерез;
• трихомониаз;
• адам папилломасы вирусы (АПВ);
• жыныс герпесі;
• АИТВ-инфекция.
Өзіңізді қалай қорғауға болады:
• Жыныстық қатынас кезінде үнемі мүшеқап пайдаланыңыз;
• ЖЖБИ мен АИТВ-ға тұрақты түрде тест тапсырып тұрыңыз;
• Кездейсоқ және қорғанусыз жыныстық қатынастан аулақ болыңыз;
• Жыныстық серігіңізбен денсаулық тақырыбында ашық сөйлесіңіз;
• Алғашқы белгілер (бөлінді, қышу, ауырсыну) пайда болған жағдайда дереу дәрігерге қаралыңыз.
ШҚО ЖИТС орталығы не істейді?
Біздің мамандар тегін кеңес береді, АИТВ мен басқа да ЖЖБИ-ге экспресс-тестілеу жүргізеді, жастар мен ересектерге арналған ақпараттық кездесулер өткізеді. Біздің мақсатымыз — әр адамның өзін қауіпсіз әрі хабардар сезінуіне көмектесу.
Есіңізде болсын: алдын алу — бұл оңай, қолжетімді және тиімді жол. Өзіңіз бен жақындарыңызды қорғаңыз. Ерте диагностика мен қауіпсіз мінез-құлық — салауатты болашақтың кілті!
