Өскемен қаласында Шығыс Қазақстан облысындағы мемлекеттік мекемелер мен үкіметтік емес ұйымдардың жоғалған адамдарды іздеу мәселесіне арналған дөңгелек үстел өтті. Іс-шараны Шығыс Қазақстан облыстық ЖИТС-тің алдын алу және оған қарсы күрес орталығы ұйымдастырды.
Кездесуге ЖИТС орталығының мамандарынан бөлек, ШҚО денсаулық сақтау басқармасының басшысы, ШҚО полиция департаментінің Өскемен қалалық полиция бөлімінің өкілі, ШҚО ПД жергілікті полиция қызметі басқармасының өкілі, Облыстық психикалық денсаулық орталығының наркология бөлімінің басшысы, сондай-ақ үкіметтік емес ұйымдардың өкілдері – «Answer» ҮЕҰ және «Қазақстанның болашағы үшін» жастар қоғамдық бірлестігі қатысты.
Дөңгелек үстелде өңірдегі 2024 жылдың қорытындысы бойынша АИТВ инфекциясының эпидемиологиялық жағдайы, «95-95-95» стратегиясының негізгі көрсеткіштері және антиретровирустық терапияның (АРТ) АИТВ-ның таралуының алдын алудағы рөлі талқыланды. Әсіресе, медицина және әлеуметтік қызметтердің назарынан тыс қалған, бірақ көмекті қажет ететін адамдарды іздеу мәселесіне ерекше көңіл бөлінді.
Кездесудің маңызды бөлігі есірткі есебінде тұрған адамдарды тексеру көрсеткіштері мен осыған байланысты мәселелерді талқылау болды. Сондай-ақ, жоғалған адамдарды іздеу бойынша әртүрлі ұйымдардың күш-жігерін біріктіруге, құпиялылық қағидаттарын сақтауға, стигма мен кемсітушілікпен күресуге бағытталған меморандум жобасы қарастырылды.
Іс-шара қорытындысы бойынша мемлекеттік құрылымдар арасында үйлесімді және бірлескен жұмысты қамтамасыз ететін тұжырымдама әзірленді. Мұндай тәсіл жоғалған адамдарды іздеу тиімділігін арттыруға, олардың медициналық және әлеуметтік көмекті қолжетімді алуына ықпал етуге, сондай-ақ өңірде АИТВ инфекциясының таралуын төмендетуге мүмкіндік береді.
